Archive for دسامبر, 2009

پیاوه‌تی

دسامبر 25th, 2009

مامۆستا عه‌تا ئه‌یوت چه‌ند رۆژ پێش ئێستا یارمه‌تییه‌کی ماڵیمان له لایه‌ن مامۆستاکانه‌وه کۆ کرده‌وه بۆ خوێندکارێک که زۆر نه‌دار بوو. لێی وه‌رگرتین! به‌یانی ئه‌ووه‌ڵ وه‌خت هاته به‌ر ده‌رگه‌ی ده‌‌فته‌ری خوێندنگه و یارمه‌تییه‌که‌ی به شه‌رمه‌وه پێ‌داینه‌وه! وامان زانی له کاره‌که‌مان ناڕه‌حه‌ت بووه! به‌ڵام وه‌کوو پیاوێکی گه‌وره رووی تێکردین و وتی:
– من رۆژانی پشووی خوێندنگه هاوسێ‌ماڵێکی وه‌ساکارمان هه‌یه که له گه‌ڵ‌خۆیدا ئه‌مبات بۆ کار کردن و ئه‌م کاره تۆزێک یارمه‌تی‌ده‌ری بنه‌ماڵه‌که‌مانه به‌ڵام هاوکلاسێکمان هه‌یه که پێڵاوه‌کانی زۆر ناله‌بارن و هێنده‌یش نه‌دارن که ناتوانێک پێڵاوێکی‌ تازه دابین بکات! داواتان لێ ئه‌که‌م ئه‌م یارمه‌تییه بده‌ن به‌ ئه‌و که له من زۆرتر پێویستی پێیه…!
ئه‌م داستانه‌ی کاک عه‌تام هێنده به لاوه سه‌یر بوو که پێشتر پێم وابوو داستانی له‌م چه‌شنه ته‌نیا له فیلمه‌کاندا روو ئه‌دات به‌ڵام وا دیاره که هێشتا هه‌ستی مرۆڤ‌‌دۆستی به ته‌واوی هه‌ره‌سی نه‌هێناوه!

Posted in تێکه‌ڵ | Comments (0)