Archive for اکتبر, 2010

“مه‌ریوان”ی ته‌پ و تۆزاوی، “شیلی” پڕ له نه‌رگس!

اکتبر 14th, 2010

کاتێک پاش چوارده‌ساڵ هات و چووی سه‌وڵاوا و به هه‌زار ئه‌ڵڵا ئه‌ڵڵا و ناوخوا ناوخوا شوێنی کارم گواسته‌وه بۆ مه‌ریوانێک که به شاری خۆمم ئه‌زانی، به ته‌ما نه‌بووم هه‌موو شتێک وه‌ها ناشیرین بێت! ئیداره و خوێندنگه و مامۆستای ته‌پ و تۆزاوی! له یه‌که‌م ساته‌کانی هاتنه‌وه‌م و پێش هه‌ر شتێک کاربه‌ده‌ستێکی سه‌ره‌کیی ئیداره راپۆرتێکی پیاوانه‌ی له سه‌ر بشێوێنیم! دا و وتیان تۆمان ناوێت و بڕۆره‌وه بۆ سه‌وڵاوا! پاش دروست کردنی دۆخه‌که چوومه هه‌ر کوێیه‌ک ترس و له‌رز و سه‌رداخستن نه‌بێت هیچم له هاوکاره‌کانه‌وه نه‌دی! خه‌ریکم ئه‌خنکێم! بار و دۆخێکی شێرپه‌نجه‌هێنه‌ره! قیزم ئه‌شێوێته‌وه…!

دڵخۆشی ئه‌م رۆژانه‌م هیوایه‌ک بوو که کرێکاره شیلیاییه‌کان پێیان ئه‌به‌خشێم! خۆش ویستنی ژیان و ته‌زووخستنه گیانی هه‌موو ئه‌وانه‌ی که هیشتا تۆسقاڵێک به‌ها بۆ مرۆڤ دائه‌نێن و حورمه‌تی ژیان ئه‌پارێزن. کاتێ ئه‌یانهێنانه ده‌ره‌وه دڵم پڕ بووبوو! قه‌ینا! با لێره نه‌بێ و له‌وێ بێ! جا بۆچی لێره که‌ی ته‌نیا که‌سێک بۆ  ته‌نیا چرکه‌یه‌ک به دڵ خۆی ژییاوه که من که‌سی دووهه‌می بم؟!

Posted in ره‌خنه | Comments (2)

چه‌قۆ!

اکتبر 2nd, 2010

1- یه‌که‌م وانه‌‌ کوردییه‌کان که فێری بووم گرێ‌دراوی ده‌نگی ره‌سه‌ن و زوڵاڵی “حه‌مه‌جه‌زا” یه! کاتی هه‌واڵی مه‌رگیم بیست، “شریتی عومری رابردوو وه‌کوو خه‌و هاته به‌رچاوم” !
2- زۆر ساڵ پیش ئێستا خوێندکارم بوو! سێ‌ڕۆژ پێش ئه‌مڕۆ به شێوه‌یه‌‌کی دڕندانه کوشتیان! کاتێ بیستم که که‌سێکیان سه‌للاخی کردووه و به له‌ت و پاری ته‌رمه‌که‌ی له گه‌ڕه‌کێکی مه‌ریواندا دۆزراوه‌ته‌وه مات و حه‌یران بووم. کاتێ ناوه‌که‌یشیم بیست دڵنیگه‌رانتر بووم! ناوی زۆر به لامه‌وه ئاشنا بوو! زۆری پێنه‌چوو که زانیم ئه‌میری مه‌جیدی خوێندکاری ساڵانی پیشووم له ژاوه‌رۆدا بووه. ته‌زیم و له پێ که‌وتم…
3- ئاستی لێبوردن و چاوپۆشی جه‌ماوه‌ر له یه‌ک له تاڵه‌ده‌زوویه‌ک باریکتر بووه و به موویه‌که‌وه به‌ستراوه‌ته‌وه! بۆقی ئۆتۆموبیلێک به‌سه بۆ دابه‌زینی شۆفیره‌کانی و چه‌قۆکیشییان له یه‌ک! ئه‌ڵێن ته‌نیا له مانگی رابردوودا سی و شه‌ش رووداوی چه‌قۆکێشی که برینداری لێکه‌وتوه‌ته‌وه له نه‌خۆشخانه‌ی مه‌ریواندا چاره‌سه‌ری پزیشکییان بۆ کراوه! ئه‌مه یانێ هیچ ده‌مبۆڵه و شه‌ڕێکی ناو شار بێ‌چه‌قۆکێشی کۆتایی نه‌هاتووه! هیوادارم به زه‌خمی چه‌قۆ نه‌مرین!

Posted in تێکه‌ڵ, کۆمه‌ڵگا, هه‌واڵ | Comments (1)