Archive for نوامبر, 2011

جا ئه‌ترسم…

نوامبر 27th, 2011

به‌یانی کات‌ژمێر 38و7 له ماڵه‌وه رێکه‌وتم! تا گه‌ییم‌ 9 خوله‌کم پێچوو! له ناو حه‌وشه‌ی خوێندنگه چاوم که‌وت به کچێکی خوێندکار که لای چاوی چه‌پی خراپ که‌وه و سه‌وز بووبوو! خوێندکاری خۆم نه‌بوو به‌ڵام ئه‌مزانی کێیه. پاش زه‌نگی ئه‌ووه‌ڵ پرسیم به شوێنیدا و ده‌رکه‌وت که باوه‌ژنی پێنج‌ڕۆژ پێش ئێستا لێی داوه! زه‌نگی دوایی نه‌مزانی چۆن تێپه‌ڕ بوو! عه‌ککاسی دیجیتاڵم بوو. تێکه‌ڵم کرد و سه‌عات و نیوێکم کوشت! کات‌ژمێر 11 پێش ئه‌وه کاکه‌ریم چاییه‌که‌ی بێنێته ده‌فته‌ر کچێکی‌تری خوێندکار به گریانه‌وه ئه‌پاڕایه‌وه که ئیجازه‌ی بده‌ن زه‌نگی ئاخر نه‌چێته کلاس! ئه‌یوت دایکی یازده مانگه تۆراوه و ناگه‌ڕێته‌وه و ئێستا باوکی ئه‌یه‌وێت ژنێ‌تر بێنێت و ئیمڕۆ ئه‌ڕۆن کراسی بۆ هه‌ڵگرن. ئه‌ویش ناچارکراوه له گه‌ل باوک و باوه‌ژنیدا بچێت بۆ کراس سه‌ندن! زه‌نگی ئاخر نه‌چوومه کلاس! یانێ نه‌متوانی بڕۆم!
هه‌ڕام کرد!هه‌موو رۆژه‌کانمان سیخناخن له ئه‌م دیمه‌نانه! لێواولێون له بۆنی که‌لاکه تۆپیو! ئاخنراون له بێ‌ئوکسیژێنی! جا ئه‌ترسم کاتێ مردم و نامیانه ناو گۆڕه‌که و خه‌ڵک گه‌ڕانه‌وه و فریشته‌کانی قه‌بر هاتن به‌رۆکیان پێ‌گرتم ده‌س که‌ن به پرسیار کردن لێم! یانێ روویان بێت پرسیارم لێ‌که‌ن؟؟؟ ئاخر مه‌گه‌ر چه‌ن خوله‌ک “ژیاوم” و “ژیاوین” که پێویستی به وه‌ڵام دانه‌وه بێت؟

Posted in خۆمانه, ره‌خنه, کۆمه‌ڵگا | Comments (1)

“زرێبار”

نوامبر 16th, 2011

شوێن: نه‌گه‌یشتوو به سێ‌ڕای “به‌رده‌ڕه‌‌شه”، به‌رانبه‌ر  ”زرێبار”

کات: 15ی8ی90 رۆژی جه‌ژنی قوربان

کات‌ژمێر: 47 و 2 ی دوانیوه‌ڕۆ

کامێرا: Nikon D40

Posted in وێنه | Comments (1)

له “هه‌ورامان”ه‌وه

نوامبر 4th, 2011

ئیمڕۆ له‌و رۆژانه بوو که ” دڵۆپ، دڵۆپ” باران خه‌ریک بوو گوڵی ئه‌نووسییه‌وه!به‌ر له نیوه‌ڕۆ خۆمان‌دا له رێگه‌ی ” هه‌ورامان” و سروشتێکی سیخناخ له “تباین” و
ره‌نگمان دی! له‌ززه‌ت‌به‌خش و ساف! تا رێگه سانتێکی مابوو به خاک، چووین! به‌رانبه‌ر” سلێن” و ” بڵبه‌ر” راوه‌ستابووین و فره‌ی خایاند تا “نیان”م رازی‌کرد واز له روانین بێنێت و بگه‌ڕێینه‌وه! “عکس” یانێ ” پێچه‌وانه”! چ وشه‌یه‌کی دروست! ئه‌م وێنه هی چرکه‌یه‌کی ئیمڕۆیه! ئێپسیلۆنێکیش تامی وێنه هه‌قه‌تییه‌که‌ی نییه! به‌ڵام بێژین چی! بۆ ئێوه‌یه‌ک که شایه‌د ئیمڕۆی ئێره‌تان نه‌دیبێ، خراپ نییه:

له هه‌ورامانه‌وه به‌رانبه‌ر ” سلێن” و ” بڵبه‌ر”

Posted in وێنه | Comments (0)

دڕنده‌کانیش ئه‌مرن!

نوامبر 1st, 2011

ئه‌ڵێن کاتێ سوپای موغول ” نه‌یشابوور” داگیر ئه‌کات و فه‌رمانی کوشتاری پێ‌ئه‌درێت، هه‌موو بوونه‌وه‌رێک له خاکی ” نه‌یشابوور”دا به دڕندانه‌ترین جۆری ئه‌که‌ونه به‌ر کوشتن و ده‌ست‌درێژی. بکوژان پاش چه‌ندڕۆژ کاتی گوزه‌ر له په‌نای ماڵێکدا ده‌نگی گریانی منداڵێک ئه‌بیسن! چۆن؟! هێشتا مرۆڤێک زیندووه؟! به په‌له ئه‌ڕۆنه ژووره‌وه! له ژێر هه‌یکه‌لی دایکێکی مردوودا، زارۆکێکی شیره‌خۆره‌ی دوو سێ مانگه‌ زیندوو و له به‌رچاوی بکوژانی دوور ماوه! کاتێ فه‌رمانده‌که‌یان ئه‌چێته پێشه‌وه و نووکی نێزه‌که‌ی ئه‌نێته ناو ده‌می منداڵه‌که، ئه‌و وا ئه‌زانێ گۆی مه‌مکی دایکه‌تی و ئه‌که‌وێته مژینی! بکوژ بۆ چه‌ند چرکه‌یه‌ک هه‌ست به ئینسانییه‌ت ئه‌کات! به‌ڵام ئه‌م هه‌سته کورت‌خایه‌نه! نووکی نێزه‌که ئه‌کات  به گه‌رووی منداڵه‌که‌دا و ئاخرین زینده‌وه‌ری “نه‌یشابوور” به‌م جۆره له ژیانی کۆیله‌یی رزگاری ئه‌بێت…

ئه‌مانه هاتن و بۆ ساڵه‌های ساڵ و سه‌دان جار بوون به خاوه‌نی گیانی ئینسانه‌کان و ترس و له‌رزیان خسته جه‌سته‌ی هه‌زاران هه‌زاران که‌س و که‌چی مردن و ئه‌یشمرن…

ئه‌مه و هه‌زاران هه‌زارانی وه‌ک ئه‌مه به‌سن بۆ ئه‌وه منداڵێکی خوێندکاری سه‌ره‌تاییش بزانێت که زبری و خوشوونه‌ت ئه‌سوێت! دڕنده‌کانیش ئه‌مرن! مرۆڤ ئه‌گه‌ر له دڵه‌وه بڕوای به “که‌ر” و “دار” و “ته‌نه‌که‌” یش بێت به‌سه بۆ ئه‌وه قینی له کوشتار بێت! نازانم بکوژانی ئه‌م سه‌رده‌مه بڕوایان به چییه که وه‌ها ئاسایی ئه‌کوژن و ئه‌سووتێنن و گۆڕستانه‌کان ناوه‌خت ئاوه‌دان ئه‌که‌نه‌وه؟

Posted in ره‌خنه | Comments (0)